Cada dia l'escrivan Ubèrt Dutech que'ns raconta un eveniment vertadèr que s'ei passat lo quite dia dens l'istòria deu Bearn despuish lo sègle 11 dinc au dia de uei, en tots los domènis !

Escotatz l'anóncia per mei d'informacion :

Generic de l'emission mercés a Xarnege. Musica tirada deu tròç "Gaston" deu disc "Musica de contrabanda".

Oraris de difusion : 7h55, 9h20, e en seguir deus jornaus de 12h,18h e 23h

Ubèrt Dutech qu'a tanben un site : bona visita !

Cada setmana que podetz escotar las emissions de 'Dia Per Dia' de la setmana d'abans.

30 d'aost de 1398 : Lo Senescau de Tolosa que hica a execucion las miaças deu rei, a l'encontre deu navèth vescomte biarnes Archambaud.

31 d'aost de 1950 : Descobèrta de l'entrada deu peridèr de la Pèira Sent-Martin, per Jòrdi Lépineux.

1er de seteme de 1765 : Parucion de la lista de las maisons borguesas de Pau, gaudissant de daubuns privilègis.

1 e 2 de seteme de 1848 : La tropa qu'ei enviada de Pau tà  Arròs-de-Nai, on son interviengudas susmautas, au parat de « l'impòst deus 45 centimes ».

3 de seteme de 1625 : Hens lo purmèr devis prononciat en francés au Parlamant de Navarra, l'advocat Arnaut de Bordenave, que's hè l'interpreta deu sentit comun, en díser l'abandon de l'usatge deu biarnes hens aquèra institucion, que'u hasè dòu.

4 de seteme de 1794 : Batalha de Lescun, gavidada per Arman de laclède.

5 de seteme de 1652 : Los jurats d'Auloron que constatan amarosament, la pèsta qu'ei tornada.

Lo darrèr libe d'Hubert Dutech : "Lo temps de las gruas". Un libe de la tasca, on tots los dialògues e son escrivuts en gascon (arrevirat) e enteneders ad aquera adreça : www.lebearn.net/grues.html.

"La purmèra guèrra mondiau qu'arriba tot escàs d'acaba's, deishant l'umanitat hens un estat  lamentable, autan  pietadós que lo milhocar que Jan espia d'un aire en·hastiat. N'avè pas podut har la cuelhuda deus cabelhs permor deu maishant temps, e las purmèras gruas qu'èran dejà apareishudas hens lo cèu grisàs deu petit cerquit pirenenc. Que passavan pro baish, anonciant dab ua quasi certitud l'arribada avanciva de la néu : causa qui n'avè pas mancat d'arrebrembar Jusèp, lo vielh oncle avisat. Dab la néu, los trebucs de la vita vitanta de la familha Laborde, qu'anavan amplifica's e har vàder problematics tots los tribalhs corrents. Totun, Blanca, la dauna de la Casa, qu'avè peu cap ua auta preocupacion, hèra mei importanta tà sons uelhs que totas la autas. Ua preocupacion tant importante, que ne gausava pas revela-ne la tenor a Jan.
Hens aqueras  hautors de la vath de Barospe, sola la determinacion herotja de cadun a vóler mantengue-s'i a maugrat de las arreventadas, e la solidaritat enter vesins, que permetè d'acarà's aus espròbas shens cès renoveladas."