 
Que s'ei prestat Jean-Yves Ferri, dens un evident plaser, a la sedença de dedicacion a l'auditorium d'Este de Vilhèra. L' Institut Occitan que convidava tanben a Vincent Poeydomenge de la libraria paulina, especializada en bendas d'imatges, Bachi Bouzouk. Lo fin scenarista de « Retour à la terre » (dessenhat per Manu Larcenet), autor deu singular « De Gaulle à la plage » e creator d'« Aimat Lacapèla » lo policièr deu Burèu d'Investigacion Tarnés qu'èra cornacat per Christine Leriche, de las edicions Fluide glacial. Que l'acompanhava sustot Claudi Balaguer, lo traductor a l'occitan lengadocian (rocada nòrd de Tarn) d'Aimat Lacapèla, tòme quate : Bèstias del Bon Dieu. Ua bona arrevirada a l'occitan qui da tanben ua vita navèra a la seria de Fluide Glacial, en venta pertot.
Au micrò de Domenja Lekuona, Jean-Yves Ferri que dedica en tot tribalhar lo son occitan.
Escotar {audio}images/stories/090417_jean_yves_ferri.mp3{/audio}.
L'integralitat de las entervistas dens En Ondas lo dimèrcs 29 d'abriu a 21h, lo dijaus 30 d'abriu a 14h e lo dimenge 3 de mai a 11h. Tanben dens lo vòste setmanèr La Setmana d'ací quauques dias.
Ferri, gentleman-bordèr-detectiu e Fluide Glacial que switchan tà l'òc.
Que m'avè drin hèit pujar la mostarda, com pareishèva Ferri, en episòdi mesadèr dens Fluide – haut lòc d'ua cèrta urbanitat parisenca. Qu'estoi a mand d'escríver a la redaccion tà protestar que los occitans que passam tostemps per pèpis... E puish que m'avisèi que lo prosei de Jean-Yves Ferri soava juste, que l'anar descalat deus personatges, de las situacions que'us dava ua pagèra auta d'on gessiva un sorríser esmavent quan n'èra pas un franc esclacat d'arríder. Ua cèrta distanciacion de çò qu'èm qu'ei tostemps planvienguda e las rasons de s'espetar d'arríder que son tròp rialas tà passar a costat ! Vertat ei, que m'aví hèit lavetz la refleccion : en occitan l'òbra qu'avora enqüèra mei de fòrça. Qu'ac avèvi saunejat, Fluide e Ferri que l'an hèit ! Aimat Lacapèla, Mameta, los vesins e lo maire (ascendéncia revelada dens aqueste tòme 4), las garias qui alexandrejan, los parisencs qui parisencan, lo mairam e los hadets que switchan tà l'òc.
Autant desbondà's de tira : pas la pena de léger lo present article tà esperar sabé'n mei de la vita de l'autor. Chet lo tipe, retrèit com lo gentleman-bordèr-detectiu qui sembla estar, lo saunejaire bucolic qui pensan qu'ei. O lavetz qu'ei agent doble.
Per entrar en 1993 a Fluide Glacial, en 2009, París non l'atira tostemps pas.
Originari de Tarn que viu en Arièja – quau rapòrt ce'u demandam manièra de saber on s'a portat de per lo monde ? : la nacionau 88, ce nse respon quasi en s'excusar, urós de la blaga. Mancat ! E quan lo demandan s'ei gaullista que denega mes tanpauc n'ei pas un antí G* de G** primari !
Arribat a Pau peu trin, que declara aver essajat – shens succès – d'engolir en viatge, un metòde d'occitan : opuscule venerable qui amuisha urós a Claudi Balaguer. Qu'ei ce sembla lo lor purmèr encontre. E que s'i hè, pendent la conferéncia de premsa e la dedicacion, a manipular, fretà's a la lenga : qu'accèpta de respóner a las questions en occitan qui compren plan, non sonque, qu'essaja de raspilhar drin de lenga e enfin qu'embaucha a Claudi Balaguer tà har la version òc de las dedicacions !
Be seré Jean-Yves Ferri un agent doble rurau qui viveré aventuras e resolveré enigmas en exclusivitat suu territòri de Tarn (rocada nòrd) ? Qu'a l'uelh (e l'aurelha) tà traçar lo son monde de faiçon cruda, briga irreverenciosa mes solide impertinenta e de'us projectar dens situacions improbablas, desmesuradas qui'us dan ua espessor a la Tati.
Resumim : curiós deus autes, carbura viste e pausa un espiar agut e elegant suu monde.
Qu'èi especiaument aimat dens Bèstias del Bon Dieu : Romuald e Odeta qui alexandrejan, las revelacions de Mameta, Pol vodó, lo Glaudi deus cagaders (esperem que torne per noste dab lo desvolopament obligat deus cagaders secs!) e autes enfluvis, galutins, ascarits o fandrols...
Vejam lavetz se sabem léger los occitans ! Qu'ei ua question essenciau qui, l'èr d'arren com tostemps, e pausa Ferri.
Aimé Lacapelle : Bèstias del Bon Dieu – en occitan/Jean-Yves Ferri, arr. Claudi Balaguer, col. Pat Larcenet. - Paris : Fluide Glacial, 2009. - 47p. Col.
Domenja Lekuona Ràdio País
|
Reportatge 
Cars amics,
